සංක්රමණික ස්ත්‍රීන් යනු නොතකා හළ වීරවරියන්ය - අපි අපගේ ‘නොතකා හළ වීරවරියන්” සිහිපත් කරමු!
ගමනාන්ත රටවල අපගේ විදේශ සේවයේ අඩුපාඩු අධ්‍යයනය කිරීම සඳහා කමිටුවක් පත් කිරීම සහ සංක්‍රමණිකයන්ට විශේෂයෙන් කාන්තාවන්ට වඩා හොඳ සේවාවක් සහතික කළ යුතු බව “සංක්‍රමණිකයින්ගේ හඬ” (VOM) පවසයි.
අදට (08) යෙදෙන ජාත්‍යන්තර කාන්තා දිනය නිමිත්තේ එම සංවිධානයේ අධ්‍යක්ෂ මණ්ඩලය වෙනුවෙන් මයිකල් ජෝකිම් නිකුත් කළ නිවේදනයක දැක්වෙන්නේ තානාපති රටවල කාර්ය මණ්ඩලය සංක්රමණික ස්ත්‍රීන්ගේ ගැටළු පිළිබඳ වඩා සංවේදිව ක්‍රියා කරනු පිණිස පුහුණු කළ යුතුව ඇති බවයි.
මේ පිළිබඳ නිකුත් කරන ලද සම්පූර්ණ මාධ්‍ය නිවේදනය පහත පරිදිය.
2024 ජාත්‍යන්තර කාන්තා දිනය- අපි අපගේ ‘නොතකා හළ වීරවරියන්” සිහිපත් කරමු!
මෙවර ජාත්‍යන්තර කාන්තා දිනයට (මාර්තු 08) සමගාමීව ජාතික හා ප්‍රාදේශීය මට්ටමින් අප විසින් වැඩසටහන් ගණනාවක් සංවිධානය කර තිබේ. විශේෂයෙන් ස්ත්‍රීන්ට, ගැහැනු දරුවන්ට එරෙහි ප්‍රචණ්ඩත්වය ඇතුළු ස්ත්‍රී පුරුෂ සමාජභාවය මත පදනම්වූ ප්‍රචණ්ඩත්වය තුරන් කිරීම, සමාජ, ආර්ථික සහ දේශපාලන අවකාශයන්හි සියලු තීරණ ගැනීමේ මට්ටම්වලදී කාන්තාවන්ගේ සහභාගීත්වය ඉහළ නැංවීම, ස්ත්‍රීවාදී මූලධර්ම සහ නායකත්වය පිළිගැනීමේ මට්ටම ඉහළ නැංවීම ආදියට සහයවීම මෙහි අරමුණයි.
ජාත්‍යන්තර කාන්තා දිනයේදී කාන්තාවන් සහ ගැහැනු දරුවන් වෙනුවෙන් පෙනී සිටිම, උපදේශන වැඩසටහන් පැවැත්වීම සාමාන්‍ය තත්ත්වයකි. කෙසේ වෙතත්, “ස්ත්‍රීන් ” සහ” සේවිකාවන්” ලෙස ඔවුන් රට තුළ සියලු ආකාරයේ ප්‍රචණ්ඩත්වයන්ට ලක්වන අතරම අපගේ ජාතික ආර්ථිකයට අත්‍යවශ්‍ය දායකත්වයක් සපයන වැදගත්ම කොටස ලෙස “සංක්රමණික කාන්තාවන්” නොසලකා හැරීමට හෝ අමතක කිරීමකට ලක්ව තිබේ. ගමනාන්ත රටවල සේවයේ නියුතු ඔවුන්, අපේ කාලයේ සැබෑ වීර වරියන් වන මුත් ඔවුන් "නොතකා හළ වීරවරියන්"ය. මෙය රජයේ සහ සිවිල් සමාජයේ ඉතා බරපතළ අතපසු වීමක් බව සංක්‍රමණිකයන්ගේ හඬ (VOM) වන අපගේ විශ්වාසයයි.
එබැවින් “ශ්‍රී ලංකාවේ ආර්ථිකය පුනර්ජීවනය කිරීමට දායක වන සංක්රමණික ස්ත්‍රීන් සියලුම ස්වරූපයේ ප්‍රචණ්ඩත්වයන්ගෙන් ආරක්ෂා කරනු” යන්න මෙවර අපගේ ජාත්‍යන්තර කාන්තා දින තේමාවයි.
අපගේ ආර්ථිකය සැලකිය යුතු ලෙස ඉහළ නංවන සංක්රමණික කාන්තාවන් සෘජුව සහ වක්‍රව ප්‍රචණ්ඩත්වය අත්විඳීමේ අවදානමක් පවතින අතර, එය ජාතික ආර්ථිකයට සැලකිය යුතු දායකත්වයක් ලබා දීමට ඔවුන්ගේ පවත්නා හැකියාව කෙරෙහි අහිතකර ලෙස බලපායි. එවැනි කාරණා සම්බන්ධයෙන් චාරිත්‍රානුකූලව පිළිගැනීම සහ නිහඬව සිටීමෙන් පෙන්නුම් කරන්නේ අපගේ පුද්ගලික ආර්ථිකයට වක්‍රව සහාය දක්වන වඩාත් වැදගත් ආර්ථික දායකයින් කෙරෙහි යම් අගෞරවයක් සහ නොසලකා හැරීමක් සිදුවෙමින් පවතින බවයි.
මෙම සංක්රමණික කාන්තාවන්ට ශ්‍රී ලංකාව තුළ මෙන්ම ඔවුන්ගේ ගමනාන්ත රටවල ද, ප්‍රචණ්ඩ ලෙස සලකන අතර ඔවුන්ගේ අයිතිවාසිකම් අහිමි කරන බව පැහැදිලිය. මෑත වසරවලදී සංක්රමණික කාන්තාවන්ට මුහුණදීමට සිදුව ඇති බිහිසුණුම ගැටලුවක් වන්නේ මිනිස් ජාවාරමයි.
සංක්‍රමණයේ සෑම අදියරකදීම සංක්රමණික කාන්තාවන් ආරක්ෂාව සහතික කළ යුතුය. සංක්‍රමණිකයන්, විශේෂයෙන් කාන්තාවන් විසින් ප්‍රකාශ කරන ලද ප්‍රධාන දුක්ගැනවිලිවලින් එකක් නම්, සංක්රමණික කාන්තාවන්ගේ ආරක්ෂාව පිළිබඳ වගකිව යුතු "විදේශීය" තානාපති කාර්යාල, මෙම වගකීම නිසි ලෙස ඉටු කිරීමට අපොහොසත් වීම සහ අවාසනාවකට මෙන් එම තත්ත්වයම මෙම ස්ත්‍රීන් මිනිස් ජාවාරම් සහ ප්‍රචණ්ඩත්වයේ ගොදුරු බවට පත්වීමට හේතුවක් වීමයි.
සංක්රමණික කාන්තාවන්ට නිසි ඇගයීම සහ ගෞරවනීය ලෙස සැලකීමක් සිදුවන ගමනාන්තයක් පවත්නා රටවල ශ්‍රී ලංකා තානාපති කාර්යාල ගැන අපට කියවන්නට හෝ අසන්නට ලැබෙන්නේ කලාතුරකිනි. එහෙත් , පිලිපීනය වැනි රටක ලොව පුරා සිටින සිය තානාපති කාර්යාල හරහා සංක්රමණික කාන්තාවන්ට නිසි ගෞරවයක් හා පිළිගැනීමක් පවත්නා බව නොරහසකි.
දැනට ශ්‍රී ලංකාවේ කඩා වැටී පවත්නා ආර්ථිකය මේ මට්ටමින් හෝ පවත්වා ගැනීමට ප්‍රධාන දායකත්වය සපයන්නේ ස්ත්‍රීන් වන බැවින්, ගමනාන්ත රටවල ශ්‍රී ලංකා තානාපති කාර්යාල විසින් සංක්රමණික ශ්‍රමිකයන්, එනම් විශේෂයෙන් කාන්තා ශ්‍රමිකයන් හඳුනාගෙන ඔවුන් නිසි පිළිගැනීමකට හා ඇගයීමට ලක් කිරීම සඳහා අන් රටවලටත් වඩා වැඩි යමක් කළ යුතුය.
සංක්රමණික කාන්තාවන් දැඩි සේ වෙහෙස මහන්සි වී වැඩ කිරීම මෙන්ම ආර්ථිකය නඟා සිටුවීම සඳහා ඔවුන්ගෙන් ලැබෙන සුවිශේෂී දායකත්වය පිළිබඳව සංවේදී වී ක්‍රියා කිරීමට, ඒ ඒ තානාපති කාර්යාලවල සේවය කරන විදේශ සේවයේ නිලධාරීන් පුහුණු කර දැනුම්වත් කළ යුතු බව “සංක්‍රමණිකයින්ගේ හඬ” (VOM) ලෙස අපි ඉල්ලා සිටිමු. ශ්‍රී ලංකා විදේශ සේවා නියුක්ති කාර්යාංශය විසින් මේ පිළිබඳ නිසි ක්‍රියාමාර්ග ගනු ඇතැයි අපි බලාපොරොත්තු වෙමු.
ඒ් අනුව 2024, මෙවර ජාත්‍යන්තර කාන්තා දිනය නිමිත්තෙන් “සංක්‍රමණිකයින්ගේ හඬ” (VOM) සහ සංක්රමණික සමිතිවල සියලුම සාමාජිකයින් ලෙස පහත සඳහන් කරුණු කෙරෙහි අවධානය යොමු කරන්නෙමු: -
- සංක්රමණික කාන්තාවන්ගේ ගැටළු සම්බන්ධයෙන් සංවේදී විදේශ සේවා කාර්ය මණ්ඩලයක් සිටීමේ අවශ්‍යතාවය ප්‍රතිපත්තිමය වශයෙන් පිළිගෙන ඔවුන් කෙරෙහි ගෞරවය සහ පිළිගැනීම ප්‍රදර්ශනය කිරීම.
- විශේෂයෙන්ම කම්කරු සංක්‍රමණ ගමනාන්ත රටවල විදේශ සේවයට දේශපාලන පත්වීම් ලබා දීම නැවැත්වීම.
- සංක්‍රමණිකයන්ට වඩා සංවේදී වීමට අවශ්‍ය දැනුම, හැකියාව සහ කුසලතා ඇති නිලධාරීන්ගෙන් සමන්විත කාර්ය මණ්ඩලයක් හඳුනාගෙන පුහුණු කිරීම.
- ගමනාන්ත රටවල අපගේ විදේශ සේවයේ අඩුපාඩු අධ්‍යයනය කිරීම සඳහා කමිටුවක් පත් කිරීම සහ සංක්‍රමණිකයන්ට විශේෂයෙන් කාන්තාවන්ට වඩා හොඳ සේවාවක් සහතික කිරීම සඳහා සුදුසු නිර්දේශ ඉදිරිපත් කිරීම සහ විදේශ ප්‍රේෂණ ප්‍රවාහය වැඩි කිරීමෙන් අපගේ ආර්ථිකය පුනර්ජීවනය කිරීමට රජය දරන උත්සාහයට සහාය වීම.
මීට අමතරව අප කාලයක් තිස්සේ කරනු ලැබූ ඉල්ලීම් නැවත සිහිපත් කරන්නෙමු.
V. සුදුසු තාක්ෂණික ක්‍රම යොදා ගනිමින් ගමනාන්ත රටවල සිටින සංක්රමණික සේවකයන්ගේ ඡන්ද අයිතිය තහවුරු කිරීම.
VI පිළිගත් අභිප්‍රායිත නිර්ණායක වලට අනුව සංක්‍රමණය "කර්මාන්තයක්” සහ සංක්රමණික සේවකයින් "සේවකයින්" ලෙස හඳුනා ගැනීම.
මයිකල් ජෝකීම්
‘සංක්‍රමණිකයින්ගේ හඬ’ ලේකම් මණ්ඩලය වෙනුවෙන්.
2024-03-06.
