මාධ්‍යම පළාත් මාධ්‍යෙව්දින් ජාතික ජනමාධ්‍ය ප්‍රතිපත්තියක් අවශ්‍ය බව කියයි - අසේල කුරුළුවංශ
මෙරට තුළ යහපත් ජනමාධ්‍ය භාවිතයක් ඇති කිරීම සඳහා ජාතික ජනමාධ්‍ය ප්‍රතිපත්තියක් අවශ්‍යය බව මධ්‍යම පළාත් මාධ්‍යවේදීන් හා සිවිල් සංවිධාන ක්‍රියාකාරීහු පවසති.
ජනමාධ්‍ය අමාත්‍යාංශය මගින් පත් කරන ලද බහුපාර්ශවීය කමිටුවක් මගින් කෙටුම්පත් කළ ජාතික මාධ්‍ය ප්‍රතිපත්තියේ මූලික කෙටුම්පත (Zero draft) පිළිබඳව මධ්‍යම පළාතේ ජනමාධ්‍ය වේදීන්ගේ සහ සිවිල් සමාජ ක්‍රියාකාරීන්ගේ අදහස් හා යෝජනා ලබා ගැනීම සඳහා වැඩසටහනක් (22) දින මහනුවර දී පැවැති අවස්ථාවේ ඔවුහූ මේ බව ප්‍රකාශ කළහ.
එක්සත් ජාතීන්ගේ සංවර්ධන වැඩසටහනේ දායකත්වය මත නිදහස් මාධ්‍ය ව්‍යාපාරය මගින් මෙම වැඩසටහන මෙහෙයවනු ලැබීය.
ජාතික ජනමාධ්‍ය ප්‍රතිපත්තිය අනාගතවාදී අවශ්‍යතාවක් බවත් කෙටුම්පත් කර ඇති ජාතික ජනමාධ්‍ය ප්‍රතිපත්තිය තවදුරටත් සංවර්ධනය කරමින් මෙරට ජනමාධ්‍යකරණයෙහි මාර්ගෝපදේශ ලියවිල්ල බවට පත්කර ගත යුතු බවත් වැඩසටහනට එක්වූ මාධ්‍යවේදීන් හා සිවල් සංවිධාන ක්‍රිහාකාරිහූ ඒකමතිකව තීරණය කළහ.
ජාතික මාධ්‍ය ප්‍රතිපත්තියක් රටට අවශ්‍යය යැයි කියන මතයේ සිට මෙරට ජනමාධ්‍ය පුළුල් ප්‍රතිසංස්කරණයකට ලක්විය යුතු බවට යෝජනා නිදහස් මාධ්‍ය ව්‍යාපාරය විසින් පසුගිය කාලය තුළ ඉදිරිපත් කරනු ලැබීය.
ජනමාධ්‍ය අමාත්‍යාංශයේ මැදිහත් වීමෙන් ඉදිරිපත්ව තිබෙන මෙම යෝජනාවලිය නිදහස් මාධ්‍ය ව්‍යාපාරයේ අරමුණු හා යම් දුරකට සමපාත වන බැවින් අදාළ කෙටුම්පත වඩාත් පුළුල් සහ සාරගර්භ එකක් බවට පත් කිරීම සඳහා දිවයිනේ පළාත් කිහිපයක මාධ්‍යවේදීන් හා සිවිල් ක්‍රියාකාරීන් හමුවී අදහස් හා යෝජනා ලබා ගැනීමට තීරණය කළ බව එහි කැඳවුම්කරු ලසන්ත ද සිල්වා මහතා කීය.
මෙම අවස්ථාවට නිදහස් මාධ්‍ය ව්‍යාපාරයේ විධායක කමිටු සාමාජිකයින් වන සුනිල් ජයසේකර, සී. දොඩාවත්ත, ආනන්ද ජයසේකර, ශාන් විජේතුංග යන මහත්වරු ද සහභාගි වූහ.
ඡායාරූපය- යහපත් ජනමාධ්‍ය භාවිතයක් ඇති කිරීම සඳහා ජාතික ජනමාධ්‍ය ප්‍රතිපත්තියක් අවශ්‍යය බවට මධ්‍යම පළාත් මාධ්‍යවේදීන් හා සිවිල් සංවිධාන ක්‍රියාකාරීහු අත් ඔසවා එකඟතාව පළ කළ අයුරු
| අසේල කුරුළුවංශ
