වෙනස්කොට සැළකීමට එරෙහිව ආර්පිකෝ වතු කාර්ය මණ්ඩල අඛණ්ඩ වැඩ වර්ජනයක

ආර්පිකෝ සමාගම යටතේ පාලනය කෙරෙන නමුණුකුල, මස්කෙළිය සහ කෑගල්ල යන වැවිලි සමාගම් වල සේවයේ නිරත වතු කාර්ය මණ්ඩල සාමාජිකයින් නොවැම්බර් 28 දා දින සිට අඛණ්ඩ වැඩවර්ජනයක් දියත් කරන බව ලංකා වතු සේවා සංගමය කියයි.

සමාන රාජකාරි කටයුතුවල නිරත අනෙකුත් ප්‍රාදේශි වැවිලි සමාගම්වල වතු කාර්ය මණ්ඩලය භුක්ති විඳින වැටුප්, වරප්‍රසාද, රැකියාවේ සුරක්ෂිතතාව, සමාජ ආරක්ෂණය ඇතුළු සේවා අයිතිවාසිකම් ආර්පිකෝ වතු සමූහයේ නමුණුකුල, මස්කෙළිය සහ කෑගල්ල යන වැවිලි සමාගම් වල සේවයේ නිරත වතු කාර්ය මණ්ඩල සාමාජිකයින්ට අහිමි කිරිමට ආර්පිකෝ කළමණාකාරිත්වය පියවර ගැනීම මෙම වතු කාර්ය මණ්ඩල අඛණ්ඩ වැඩ වර්ජනය කැඳවීමට හේතුවී තිබේ.

මේ අනුව නොවැම්බර් 28 දින සිකුරාදා පෙරවරු 8 සිට ආර්පිකෝ වතු සමූහයේ පහතරට කලාපයේ වතුවල සියළුම වතු කාර්ය මණ්ඩල සාමාජිකයින් මෙම අඛණ්ඩ වැඩවර්ජනයට එක්වන අතර නොවැම්බර් 29 දින පෙරවරු 8 සිට ආර්පිකෝ වතු සමූහයේ උඩරට කලාපයට අයත් සියලුම වතුවල වතු කාර්ය මණ්ඩල මෙම ක්‍රියාමාර්ගයට එක්වනු ඇත.

ඒ අනුව පහතරට සහ උඩරට වතු 54ක ලිපිකරු, කර්මාන්තශාලා, ක්ෂේත්‍ර, සෞඛ්‍ය, සහ සහාය කාර්ය මණ්ඩල මෙම වර්ජනයට එක්වීමට නියමිතය.

මෙම වෘත්තිය සමිති ක්‍රියා මාර්ගයේදී වර්ථමානයේ උද්ගතව තිබෙන අයහපත් කාලගුණික තත්ත්වය සැළකිල්ලට ගනිමින් වතුවල හදිසි ආපදා කාරණා වලදී අවශ්‍ය වන සුබ සාධන හා සෞඛ්‍ය සෙවාවන් ස්වේච්ඡාවෙන් ලබා දීමට සංගමය වතු කාර්ය මණ්ඩල සාමාජිකයින්ට උපදෙස් ලබා දී ඇත.

ජාත්‍යන්තර කම්කරු සංවිධානයේ සම්මුතීන්ද නොතකා හරිමින් මෙම සමාගම ජාත්‍යන්තර සදාචාර සහතිකකරණ ගිවිසුමද කඩකරමින් කටයුතු කරමින් සිටින අතර එකම ක්ෂේත්‍රයක එකම ආකාරයේ වෘත්තීන්වල නිරතවන පිරිසකට දෙයාකාරයකට සැළකීම තවදුරටත් ඉවසන්නට වගකිවයුතු වෘත්තීය සමිතියක් ලෙස ලංකා වත් සේවා සංගමය සුදානම් නොමැති බවත් අවධාරණය කරයි.

සමාන රාජකාරී කටයුතු වල නිරත අනෙකුත් ප්‍රාදේශීය වැවිලි සමාගම් වල කාර්ය මණ්ඩලය බුක්තිවිඳින අයිතිවාසිකම්, වරප්‍රසාද, රැකියාවේ සුරක්‍ෂිතභාවය, සමාජ ආරක්‍ෂණය ආර්පිකෝ වතු සමූහයේ නමුණුකුල, මස්කෙළිය, කෑගල්ල ප්‍රාදේශීය වැවිලි සමාගම් වල වතු කාර්ය මණ්ඩලයට අහිමි කර ඇති ආකාරය.

1. වාර්ෂික වැටුප් වර්ධකය Annual Increment වසර හතක් නොගෙවා පැහැර හැරීම.

2. නවක කාර්ය මණ්ඩල සාමාජිකයන් සඳහා වෛද්‍යාධාර දීමනාව අහෝසිකර වෙනස්කොට සැලකීම.

3. ගෙවල් කුලී දීමනාව House Rent Allowance වසර 9 ක් පුරා සංශෝදනය නොකොට අඩුවෙන් ගෙවීම.

4. කාර්ය මණ්ඩල සාමාජිකයෙකුගේ මරණයකදී පවා ගෙවන මරණාධාර දීමනාව අඩුවෙන් ගෙවීම.

5. ගබඩා භාරකරු දීමනාව 15% ක් වුවද 12.5% ක් පමණක් ගෙවීම.

6. ආරම්භක වැටුප් නියමිත අගය ලබාදීමෙන් වැළකී අඩුවෙන් ගෙවීම.

7. Overlooking දීමනා නොගෙවීම.

8. Acting දීමනා අඩුවෙන් ගෙවීම.

9. ස්ථීර සේවය සඳහා ස්ථීර පත්වීම් ලබානොදී විශ්‍රාම වයස ඉක්ම නොගිය සේවකයන් කාල නියම කොන්ත්‍රාත් පදනමින් බඳවා ගැනීම.

10. උසස්වීම් ක්‍රියා පටිපාටිය නොසලකා කටයුතු කිරීම.

11. විනය ක්‍රියා පටිපාටිය නොසලකා හැර ස්භාවික යුක්තියේ මූලධර්ම උල්ලංඝනය කිරීම.

12. අතිකාල ඌනතාවයක් සහිතව ගණනය කිරීම.

13. වෛද්‍යාධාර ඌනතාවයක් සහිතව ගණනය කිරීම.

14. EPF/ESPS/ETF ඌනතාවයක් සහිතව ගණනය කිරීම සහ සේවකයන්ට විශ්‍රාම ගැනීමේදී අඩුවෙන් ගෙවීම.

15. විශ්‍රාමික සේවකයන්ට සේවා පාරිතෝෂික දීමනාව Gratuity ඌනතාවයක් සහිතව ගණනය කර ගෙවීම.