මෙරට ශ්‍රම බළකායට ඇති වටිනා සම්පතක් වන සේවක අර්ථ සාධක අරමුදලට නව ඩිජිටල් පද්ධතියක් හඳුන්වා දෙන බව රජය ප්‍රකාශ කර තිබේ.
කම්කරු අමාත්‍ය සහ මුදල් සහ ක්‍රමසම්පාදන නියෝජ්‍ය අමාත්‍ය ආචාර්ය අනිල් ජයන්ත අඟහරුවාදා (නොවැ. 25) පාර්ලිමේන්තුවේදී අයවැය විවාදයට එක්වෙමින් ඒ බව ප්‍රකාශ කළේ ය.
ශ්‍රී ලංකා මහ බැංකුවේ සහ කම්කරු දෙපාර්තුමේන්තුවේ වෙන වෙන ම පවතින දත්ත පද්ධති එක් ඩිජිටල් වේදිකාවක් වෙත ගෙන ඒම මෙන් ම ඊට තවත් බොහෝ අංග එකතු කිරීමට සූදානම් බව ද අමාත්‍යවරයා එහිදී පැවසීය.
වසරේ 2002දී පමණ සංවර්ධනය කර ඇති සේවක අර්ධ සාධක අරමුදලේ තොරතුරු පද්ධතිය වර්තමානයට සහ අනාගතයට ගැලපෙන ලෙස නවීකරණය වී නොමැති බව ද අමාත්‍යවරයා පෙන්වා දුන්නේ ය.
"ආණ්ඩුවේ ඩිජිටල්කරණ සැලස්මටත් අනුකූල වන පරිදි සමස්ත රාජ්‍ය සේවය ම ඩිජිටල් ප්‍රවේශ වැඩසටහන යටතේ මහජනතාවට කාර්යක්ෂම සේවාවක් සැපයීමේ අරමුණින් කම්කරු දෙපාර්තුමේන්තුවට අදාළ අනෙකුත් සේවා ද මාර්ගගතව ලබා ගත හැකි පරිදි අදාළ මෘදුකාංගවලින් සමන්විත ඩිජිටල්කරණ පද්ධතියක් හඳුන්වා දීමට අවශ්‍ය කටයුතු ආරම්භ කරලා තියෙනවා," යැයි නියෝජ්‍ය අමාත්‍ය ආචාර්ය අනිල් ජයන්ත සඳහන් කළේ ය.
නව පද්ධතියෙන් හඳුන්වා දෙන සේවා මොනවා ද?
රජය හඳුන්වා දීමට සූදානම් වන පද්ධතියේ කොටස් කිහිපයක් ද අමාත්‍යවරයා පාර්ලිමේන්තුවට ඉදිරිපත් කළේය.
"සේවායෝජකයන්ට EPF/ETF ගෙවීම එක් යෙදුමක් මගින් සිදුකිරීමට හැකි වීම, දැනට ශ්‍රී ලංකාවේ මහ බැංකුව හා කම්කරු දෙපාර්තමේන්තුවට වෙන වෙන ම කළ යුතු යාවත්කාලීන කිරීම් තවදුරටත් අවශ්‍ය නොවන පරිදි දත්ත පද්ධති අතර අන්තර් සම්බන්ධීකරණයක් ඇති කිරීම, සේවකයන්ට තම රැකියාවට අදාළ තොරතුරු තම සාමාජික ගිණුම මගින් දත්ත පද්ධතියට ඇතුළත් කිරීමට අවස්ථාව සැලසීම, EPF/ETF ශේෂයන් යාවත්කාලීන වීම මාර්ගගතව පරීක්ෂා කිරීම සහ ස්වයං උත්පාදන පණිවිඩ මගින් දැන ගැනීමට අවකාශය ලබා දීම, පැමිණිලි කළමනාකරණ පද්ධතිය හා සම්බන්ධ කරමින් පරීක්ෂණ යෙදවුමක් සකස් කිරීම සහ එමගින් දෙපාර්තුමේන්තු සේවකයන්ට නිශ්චිත කාල රාමුවක් තුළ අදාළ කාර්යය ඉටු කිරීමට වගකීම පැවරීම හා එම කාල සීමාව තුළ ඉටු නොකෙරෙන කාර්යයන් පිළිබඳ පද්ධතිය මගින් සිහි කැඳවීම යොමු කිරීම හා ඩෑෂ් බෝඩ් ක්‍රමවේදයක් මගින් ඉහළ කළමනාකරණයට මනා අධීක්ෂණයක් පවත්වා ගැනීමට හැකි වීම තුළින් වඩාත් ඵලදායී හා කාර්යක්ෂම සේවක කළමනාකරණ කාර්යය සහ කාර්ය කළමනාකරණ ක්‍රමවේදයක් හඳුන්වා දීම," යනුවෙන් ඇමතිවරයා එම සේවා පිළිබඳව පැහැදිලි කළේ ය.
'මගේ ප්‍රොෆයිල් එක මට ම අප්ඩේට් කරන්න පුළුවන්'
කම්කරුවන් වෙනුවෙන් හඳුන්වා දීමට අපේක්ෂිත නව ඩිජිටල් පද්ධතිය සම්බන්ධව බීබීසි සිංහල කම්කරු අමත්‍යංශයේ ලේකම් එස්.එම්. පියතිස්සගෙන් කරුණු විමසීය.
"අපි ෆේස්බුක් එකේ ප්‍රොෆයිල් එකක් අප්ඩේට් කරන්නේ, ඒ වගේ තැනක වැඩ කරලා ඉවර වෙලා තව තැනකට යනවා, එතකොට ඒවා ඔක්කොම මගේ ප්‍රොෆයිල් එක මට ම අප්ඩේට් කරන්න පුළුවන්," යැයි ලේකම්වරයා නව පද්ධතිය ගැන පැහැදිලි කළේය.
සේවකයන්ට තම EPF/ETF මාසිකව ගෙවීම පිළිබඳව දැන ගැනීමට මෙන් ම සේවායෝජකයන්ට පද්ධති කිහිපයකට ඇතුළු නොවී තම සේවකයන්ගේ සේවක අර්ථසාධක ගෙවීම ද, ලියාපදිංචි කිරීම් ද නව ක්‍රමය හරහා පහසු කෙරෙනු ඇත.
'ID නොම්බරයේ ඩේටා ටික ඔක්කොම අපි ළඟට එනවා'
මෙම නව ක්‍රමය හරහා පුද්ගලයා හඳුනා ගැනීම සිදු කරනු ලබන්නේ ජාතික හැඳුනුම්පත් අංකය හරහා ය.
"ID නම්බර් එක දෙන්නේ KYC එකක් කරලා නේ. ඒක බේස් කරලා ඒක තමයි අපි ළඟට එන්නේ. තමන්ගේ අයිඩෙන්ටිටි නොම්බරයේ ඩේටා ටික ඔක්කොම අපි ළඟට එනවා, අපිට එයාගේ උපන් දින වෙන විස්තර වෙන ම දාන්න අවශ්‍ය වෙන්නේ නැහැ. අපිට ඕන තොරතුරු අපි ඒකෙන් කැප්චර් කරනවා," යැයි අමාත්‍යංශ ලේකම්වරයා පැවසීය.
එමෙන් ම සේවායෝජකයන්ට තම රැකියා අවස්ථා ප්‍රචාරණය කළ හැකි වන ලෙස ද නව පද්ධතිය නවීකරණය කිරීමට නියමිත බව ද ඔහු කියා සිටියේ ය.
නව පද්ධතිය ආරම්භ වන්නේ කවදා ද?
නව පද්ධතිය කම්කරුවන්ට අදාළ සියලු කටයුතු සහිතව සැකසීමට සැලසුම් කරන බව පැවසූ කම්කරු අමාත්‍යංශ ලේකම් එස්.එම්. පියතිස්ස දෙසැම්බර් මාසයේ මීට අදාළ ටෙන්ඩර් කැඳවීම කර ලබන වසරේ ඔක්තෝබර් මස සිට පද්ධතිය හඳුන්වා දීමට සූදානම් වන බව පැවසී ය.
එමෙන් ම, මෙම පද්ධතියට ඉන්ටර්නෙට් හෝ ඩිජිටල් ක්‍රම පිළිබඳව සාක්ෂරතාව අඩු පුද්ගලයන්ට සේවා ලබා දිය හැකි ක්‍රමවේදයන් ද සහිතව සැකසීමට සැලසුම් කර තිබේ.
EPF/ETF සඳහා ලියාපදිංචි වීමට ඔන්ලයින් ක්‍රමයක්
දැනට සේවක අර්ථ සාධක අරමුදලට ලියාපදිංචි වීමට කලින් වෙන් කර ගත් දිනයකදී කම්කරු කාර්යාලයට යාමට අවශ්‍ය වන අතර විනාඩි කිහිපයක් ගත වන ලියාපදිංචි වීමේ ක්‍රියාවලියට ඇතැම් විට පැය ගණනාවක් පෝලිමේ සිටීමට සිදු වේ.
මීට පිළියමක් ලෙස ඔන්ලයින් ඔස්සේ දෙසැම්බර් මස සිට සේවක අර්ථ සාධක අරමුදලේ ලියාපදිංචි වීමට අවස්ථාව සලසා දීමටව නියමිතව ඇත.
"දැන් කරන්නේ අපි අපොයින්ට්මන්ට් එකක් දීලා ඒගොල්ලන්ව අපේ කාර්යාලයකට ගෙන්නගෙන රෙජිස්ටර් කරනවා. ඩිජිටල් සිස්ටම් එකෙන් අපි කරන්න යන්නේ, ඒක ඔන්ලයින් පුරවන්න පුළුවන්. පුරවලා වැඩ කරලා සේවායෝජකයන්ට පුළුවන් තමන්ගේ සේවකයෝ ටික ඒ සිස්ටම් එකට දාන්න, දාලා EPF/ETF නම්බර්ස් අරගෙන ඒ ටික සම්පූර්ණ කරන්න. එතකොට අපේ කාර්යාලයට එන්න අවශ්‍ය නැහැ," යැයි අමාත්‍යංශ ලේකම්වරයා වැඩිදුරටත් සඳහන් කළේ ය.
(bbc.com/Sinhala)
